So met die intrapslag by een van die vooraanstaande musiekwinkels loop ek my toe mos vas in hierdie vrou. 'n Klein pakkie groot dinamiet, met 'n stem wat my laat hoop dat Sarah Brightman 'n goeie aftreepakket het. Enkele weke later het ek die voorreg om 'n koffie met haar en haar man, Pieter te deel. En ons kuier 'n hond uit 'n bos uit. Buiten haar goue stem het sy toe nog 'n opregte en innemende persoonlikheid ook.

Nadia se Jongste produksie heet "Vir jou". En vir jou is dit beslis. Net die een vir daardie spesiale leë gaatjie in jou musiek-rak. Sonder pretensie of 'n oormaat digitale effekte slaag sy daarin om spontaan 'n nuwe klank aan bestaande musiek te gee. En net as jy dink sy kan jou nie verder verras nie, speel haar eie komposisies. Vars, opgewek en verrasend anders as die geykte styl van sekere van ons meer onlangs liriekskrywers

Met die snit "Lekker in Namibië" bring Nadia loslit maar gevoelvol hulde aan haar geboorteland. Daar waar sy in 1979 haar eerste klank gemaak het. Sedertdien het sy nog nooit opgehou om vleiende klanke te maak nie. Met "Rolbos" mag jy maar nostalgies raak, want min kunstenaars kan dit met soveel passie vertolk. Dis meer as net 'n vertolking, dit word deel van Nadia. En meer nostalgies is "Die nostalgie" 'n terugblik op sorgvrye dae toe tsotsi's nog net 'n ilusie was en mense nog mense was, en bo alles, toe mense nog mense was. Vir die wat verlang na ons grootste Afrikaanse treffers, is daar 'n medley wat jou voete onder jou uitslaan. Ek wei nie uit oor watter treffers daarin vervat is nie, want dan neem ek die verrassingselement uit die aankoop van jou besondere album! Country goggas, julle is ook nie afgeskeep nie. 'n Vars weergawe van Little Bitty laat jou tone krul van lekkerkry en vir 'n oomblik dink jy jy is in die hartjie van Texas.